近日非典型肺炎引起各界迴響，加上前線醫護人員受感染的數字不斷上升，麗新集團主席林百欣深感醫護人員照顧病人十分艱辛，故他昨日捐出五十萬善款予瑪嘉烈醫院，盼起帶頭作用，陸續有人為善。
麗新集團主席林百欣昨日在其長沙灣公司舉行記者會，林伯表示從每日的新聞報道中得知非典型肺炎的情況日益嚴重，所以他捐出五十萬予瑪嘉烈醫院，捐款主要用作購買醫療用品。
林伯說：「我每日都睇好多份報紙，知道非典型肺炎嘅情況咁犀利，而且啲醫院又話連床位都唔夠。另外我又見到所有前線醫護人員都好努力咁去照顧咁大量嘅病人，佢哋同啲病人都好辛苦，所以我就帶頭捐五十萬畀佢哋，買一啲防炎用品同保護衣物。
「我想我今次可以做到一個帶頭作用，希望之後陸陸續續都會有人咁做，而且瑪嘉烈醫院入面有好多非典型肺炎嘅病人，所以我覺得我都要出一分力。」林伯更揚言今次的捐款是最有價值的一次。
此外，林伯透露早前亦捐了三百五十萬予潮陽興建水廠，他說：「有次我上到一間寺廟，聽到當地啲居民話佢哋咁多年以來飲嘅水都係黃色嘅，咁即係話啲水質好差，於是我就叫佢哋放心起一間水廠，咁樣就可以令到八萬幾人飲到質素好啲嘅水。另外我亦都捐咗四千萬畀汕頭起咗一間圖書館，總之我覺得做善事係唔需要有回報嘅。」
採訪、攝影：李珮洳
