香港近兩個月被非典型肺炎搞到五癆七傷，美股上升而港股唔升可以講得通，因此近排走勢與美股背馳，其實一啲唔出奇。按理上周五美股杜指大跌133點，對港股嚟講可說屋漏兼逢夜雨，但對淡友嚟講則係及時雨。不過，噚日恒指低開55點，見8354便展開反彈，連上周五低位8331亦跌唔穿，最後倒升26點，收8435。
恒指噚日走勢有些少出人意料，趙飛雲周圍搵原因，發覺除超賣外，1年期美電溢價縮回310點子水平，亦係利好因素。美電溢價收縮相信和近日肺炎新案下降較明顯有關，如果情況真係咁，近期炒股需要睇埋「SARS指數」。噚日港股應跌未跌，造淡要提高警覺。
前日講過恒指月線圖99年至今長期支持軌8640已經跌穿，而20日線噚日亦下移至8637，由此可知8640為一個重要好淡關鍵位。好友若要反撲，4月收市前必須重奪此重要據點。
恒指短期阻力位，仍是上周四跌穿的三角形升軌8500，由支持變阻力。原先提過恒指升近8500可再博恒指Put輪，現時肺炎有受控迹象，隨時有反彈藉口，但綜合其他因素，後市仍是偏淡。為求較佳值博率，改為在8600附近才博Put輪，並以升穿8700止蝕，其實升穿8640已應準備隨時跳車，因目前長期支持軌、短期降軌及20日線皆在附近，一旦升破，即表示港股有機會扭轉偏弱走勢。
趙飛雲