左丁山最近多戴口罩，出街必戴；一次唔記得戴，畀人眼超超，似乎鄙視左丁山冇公德心；又有女士打電話去烽煙節目，大罵啲唔戴口罩之人。於是左丁山問啲有識之士，一啲話戴唔戴都冇乜分別，一啲就話戴好過唔戴。一個美國專家就話佢自己返工都唔戴，最緊要洗手清潔。
上網可以搵到唔少資料，但係既然有一位資料專家，香江第一健筆林行止在，我哋如果同佢一齊搵料，實輸九條街畀佢，因此不如抄佢兩筆。四月十五日《信報》林行止專欄有幾百字講口罩，解釋何為N95（如正確地戴上，便有九十五巴仙機會把零點三微米0.3Micron的病毒隔離）。
但係不同工廠生產嘅N95，隔離零點三微米病毒之效，只介乎五十至九十二巴仙之間，並非一定係九十五巴仙。美國疫病控制中心（CDC）總幹事J.Gerberding話過：「當你接近病人時，用T恤圍起面部也許更有效！」美國CDC冇鼓勵和SARS患者接觸嘅人戴口罩（此點與香港說法不同）。
林行止啲資料最齊全，夠權威，如果大家認為唔戴口罩之人抵鬧，請你哋搜集多一啲國際醫學界意見。最近世衞組織專家到廣州開會視察，眼見佢哋冇戴口罩，似乎冇有怕。但有人見到佢哋同廣州領導握完手之後，就走入廁所猛咁洗手！林行止話戴或不戴口罩是一個沒有絕對答案的問題，各位唔同意，請來討論。唔好亂咁佔領道德高地，鬧人唔戴口罩呀。