昨日，亞Mark列出咗部份日本汽車代理，響原本黃金假期嘅復活節期間賣車數字；有口痕友問亞Mark，好似豐田咁一周賣66部車，幾好成績噃！難怪財爺想響汽車行業中打主意啦！但你又可知道，對比起未話加稅前，豐田2月份總銷量達550部，以𠵱家平均一周賣66部車睇嚟，兩者幾近有一半差距。再講，以本田為例，2月平均銷量每周58.5部，𠵱家黃金檔期亦只錄得44部咋！你都咪話跌幅輕微呀！另外，亞Mark有單料要報畀大家知，富豪代理權來年易手嘅消息，響行內經已甚囂塵上，原本大家都預期呢個代理權，會係森拿美集團嘅囊中物，但早幾日亞Mark收到個絕密消息，一如早前萬事得原代理陰溝裏翻船般，原本到手嘅富豪代理權又得而復失，而今趟最終嘅贏家，幾乎可以肯定係來自新加坡嘅某大集團；係邊間？咪係當地代理開富豪汽車嘅SMMotorsPteLtd.囉！所以話世事確難料，未到最後都唔知結果㗎！