東亞賽棄用和仔、阿倫
球驗客手記：港隊半力等做炮灰

曼聯季尾做「銀行隊」
最近長捧紅魔真係開心到暈，淨係英超已經連續七場贏盤。好似前晚對熱刺咁，臨場要讓一球/球半，完場前睇住要輸半個盤之際，咁都畀雲尼斯達羅補時省番粒，搞到上盤客鬼咁開心。𠵱家曼聯奪標形勢大好，未來兩場肯定拼盡，睇吓到時會唔會又做「銀行隊」。

4萬球迷見證費倫升班
費倫天拿前日響意丙二組（C2）聯賽贈沙禾納三蛋後，篤定來季升上丙一組（C1）。呢場波有成四萬人入法蘭基球場，破咗意丙入座紀錄，咁浩瀚場面連意甲都少有。膝傷嚴重嘅隊長迪李維奧喺場邊同隊友齊慶祝，場面感人。真係希望呢隊波快啲上番意甲啦。

舒利亞慘變鐵金剛
提起紐卡素前鋒舒利亞，我求大俠就諗起以前有套美國劇集《無敵鐵金剛》，因為舒利亞𠵱家同嗰個主角莫史迪好似，成個人嘅右邊包括手、臂同足踝都傷晒，佢上周六對新特蘭後上球會巴士都上唔到，最慘係紐記𠵱家要爭歐冠盃參賽資格，冇咗呢個鐵金剛，紐記自求多福嗱。

簡尼擺明唔妥拜仁
拜仁上周六提早奪得德甲冠軍，教練希斯菲特賽後喺球會巴士上宣布去邊度慶祝，點知簡尼戴住耳筒聽音樂冇聽到，結果冇去；但後來發現佢喺球隊慶功地點附近同班朋友一齊。我求大俠就諗單嘢冇咁啱嘅，睇嚟佢擺明唔妥拜仁隊波，趁機玩嘢。

小馬「揸流攤」跣捧場客
小馬係NBA列強之一，季後賽撞到拓荒者，大家都諗住佢哋食硬啦；果然輕輕鬆鬆就贏到三比○。不過到咗第四場唔知係唔係輕敵，俾傷兵滿營嘅拓荒者打到潰不成軍，尼殊射四中零「食蛋」；到咗第四節開始差不多用全後備應戰。我求大俠就覺得佢哋諗住有大把喺手所以「揸流攤」，只不過難為一眾捧場客一殼眼淚啫！