昨日何超儀、Boy'Z、Twins及鄭希怡等人到賽西湖出席網劇《一起喝采》開鏡儀式，Boy'Z透露於劇中將會獻出螢幕初吻，但就未確實會與劇中哪一位女主角有接吻戲。
對於有傳何超儀十一月與男友陳子聰結婚，超儀表示：「多謝晒，但係唔關我事，多謝無端端畀個頭條我呀，我男友都覺得好開心，因為佢話咁大個仔都冇上過娛頭，所以我哋都即時打去多謝盧小姐（指盧巧音）。總之我未有咁嘅打算，亦都唔係因為我有廣告在身，只不過我覺得自己嘅年紀未成熟到可以結婚。你哋亦都唔好睇小盧巧音只得咁少朋友，我結婚一定會講畀大家知，到時分分鐘我多幾個廣告接呀。」
再問何超儀男友有否乘機向她求婚時，她說：「人哋都冇同我求婚，你哋唔好嚇親人呀，費事我到時空歡喜一場。我覺得𠵱家好舒服，你哋諗唔諗到一個字比『滿意』重勁呀？我認為『滿意』已經係頂級，加上後生仔女未必要結婚，到適當時候我會諗呢個問題。」
採訪：李珮洳 攝影：仇志德