香港成日同人比，但次次都比輸，不過最近在公仔箱，見到北京醫護人員將個暈倒懷疑染有SARS的男人掟落擔架上。此外，又見到台灣醫護人員被隔離後竟走去跳樓，阿虎頓時覺得香港醫護人員真係優勝過人。
最近預測港股走勢，一定要識睇SARS走勢，只可惜SARS疫情與港股一樣反覆無常，雖然周日再死12人，但新症跌至20餘人左右，噚日再跌至14人，加上有專家話夏天一到，情況會進一步好轉，希望真係俾呢班專家講中啦。港股噚日只係牛皮，對專家之言暫時未有太大反應，恒指收報8435，升26點，成交60.54億元。其中備受矚目是股神畢菲特愛股中石油（857），勁升3.64%，收報1.71元，成交接近3億元。
聯想（992）噚日向外界表示，雖然會將品牌改名，但就毋須為聯想品牌存貨進行作大額撥備。高盛買盤繼續入市但不算積極，股價只反彈4.88%，收報2.15元，成交不足1億元，顯示沽盤已減少。聯想在國內已深入民心，商譽當然值錢，但始終是帳面數，今次改品牌旨在進軍國際市場，若策略成功，就可以增加錢途搵真銀。不過，阿虎唔係好習慣聯想Lenovo呢個品牌，希望聯想毋須花大多成本去做宣傳推廣。
市場傳出聯交所封殺莊家行動升級，其中一招係唔畀莊家及相關人士包銷新股，聯交所甚至會去信包銷商，點名唔畀某某君參與包銷或股份承配，以免新股被操控。不過，最近大市唔暢旺，莊家活動少之又少，否則可能又會釀成另一次仙股事件，唔知今次聯交所有冇事先諮詢市場呢？
阿虎