樂隊Beyond二十周年演唱會明日舉行，雖然喺非典型肺炎影響之下開騷，但係Beyond三子仍然有相當號召力，主辦單位負責人早前話啲門票已經賣咗九成。
馮仁昭近日睇到報章雜誌，以及朋友寄嚟嘅電郵，都話有份贊助演唱會嘅Neway同V-MIX卡拉OK，以會員優惠半價就可以買到Beyond演唱會嘅首場門票，即係四百蚊飛賣二百蚊，二百蚊飛就賣一百蚊，而V-MIX方面如果唔係會員就可以畀二十蚊立即入會，唔通啲飛真係要「賤賣」？
於是馮仁昭噚日就打電話去V-MIX卡拉OK問個究竟，卡拉OK方面話的確有大量四百同二百蚊門票剩，對於今次演唱會嘅半價優惠，主辦單位之一嘅恒藝亞洲負責人丘亞葵話：「三十號嗰場係贊助商包場嘅，贊助商優惠自己嘅顧客，而其餘場數嘅門票都已經賣咗九成。」
另外，Beyond噚日去紅館綵排演唱會，黃家強、黃貫中同葉世榮三個都以新髮型示人，對於非典型肺炎情況依然厲害，佢哋三個都話唔擔心，而黃貫中重笑住咁話：「因為我哋啲咪係浸喺消毒藥水裏面，我綵排嗰陣聞到陣消毒藥水味好勁，搞到自己都聞到highhigh哋。」
黃
肥姐沈殿霞因為身份極具代表性，所以最近被無綫委任為「海外推廣大使」，噚日馮仁昭見到肥姐喺將軍澳廣播城拍攝宣傳片段，肥姐雖然受到公司重視，但佢好謙虛咁話：「因為我老屎忽嘛！」講到已故名人寶詠琴噚日設靈，原來肥姐同佢都係雀友，所以已經致送花圈，但因為有工作在身，所以就唔能夠送佢最後一程。
馬德鐘同黃安琪早排去咗芬蘭拍攝無綫節目《紀律群英──怒雪狂奔》外景，無綫重特別安排咗二十名紀律界精英分子同行，參加多項體能考驗比賽。馬德鐘噚日接受電話訪問時話：「我哋去嘅時候，芬蘭得零下二十幾度，真係好考體力。經過呢次，我發覺自己嘅體力好似差咗，返到香港都要好好做運動，而且𠵱家SARS（非典型肺炎）咁流行，我覺得身體抵抗力好緊要，要強身健體。」
近日韓國有電影公司想幫張國榮搞個「四十九齋」追悼儀式，但唔少韓國人怕香港fans過到去會傳染非典型肺炎，不過噚日有關方面話會唔理反對繼續舉行儀式，重講明到時會有約二百名嚟自香港同中國嘅fans參加。另外，六月十二日舉行嘅韓國大鐘獎電影頒獎禮，亦都會搞個懷念張國榮嘅環節，到時成龍同黎明或者會到場。
