非典型肺炎「沙士」（SARS）爆發到𠵱家已經個幾月，死亡同埋受感染嘅人數日日上升，大使每日都要戴住個口罩扮蒙「口」超人出街，真係好辛苦。早排大使被派去高危地區工作，即刻要着晒成身防疫裝束，絕對唔敢鬆懈。不過，大使見到唔少獨居長者同埋綜援家庭除咗冇口罩之外，屋企連基本嘅消毒用品同埋漂白水都冇，佢哋同大使講，使幾十蚊買消毒用品，差唔多等於一日嘅買餸錢，所以寧願求其用水清潔，慳得就慳。
有見社會上嘅弱勢社群因為冇錢買防疫用品，早排蘋果基金就喺報紙刊出「支援弱勢社群抗炎行動」嘅呼籲，希望大家捐錢或者捐出消毒用品，另一邊廂，大使亦收到多間社會服務機構幫貧困嘅家庭同埋弱老申請抗炎物品。
喺全城對抗SARS呢場持久戰嘅時候，唔少善心人士都一齊響應「有錢出錢，有貨出貨」。某日大使收到創健企業有限公司嘅電話，負責人二話不說就捐出一批佢哋代理嘅詩樂氏消毒系列用品，包括：一萬包獨立包裝嘅消毒棉同埋一百支漂白水，大使經已安排香港社會服務聯會接收呢批物資。其實𠵱家疫情一日未受到控制，善長嘅捐款同埋商號嘅贊助都係刻不容緩，希望大家繼續支持呢個行動。
「支援弱勢社群抗炎行動」捐款編號：C0909
暖流熱線
電話：29908688
傳真：23702192
電郵：
網址：