以往五一勞動節假期，都有唔少內地人士來港旅遊兼睇樓，但現時疫症肆虐，相信今年都好難出現往年嘅盛況。長實執行董事趙國雄就話，畢架山一號原本都安排內地團來港睇樓，當中包括來自南京、上海等地嘅準買家，疫症令九成內地人士取消來港計劃，畢山內地豪客睇樓團亦難幸免。另外，集團北上宣傳新盤嘅計劃，都要暫停，原本打算到廣東省等地推廣慧景軒，同樣因為疫症而要暫停，今次真係出又唔得，入又唔得。
雖然睇樓嘅人會少咗，不過趙國雄就話冇有怕，唔擔心旗下豪宅銷情受影響，佢話，嚟得香港買樓嘅，都喺老闆級人馬，所以都唔一定要等到假期先至嚟。
受非典型肺炎打擊最大嘅行業，莫過於旅遊同飲食業，大都縮皮甚至唔做。但趙國雄透露，金怡假期正計劃承租紅磡國際都會七萬方呎樓面，認真有實力。
大廈渠喉好壞已然成物業質素嘅重要象徵，唔少私人屋苑近排都特別落力，搞好渠喉保養，如在沖廁水缸加入漂白水，甚至免費派發消毒丸畀住戶，放入馬桶水箱內。除管理公司做足工夫外，發展商亦安排活動宣傳，好似今日新地就搞記者團，安排參觀沙田欣廷軒同青衣曉峰園嘅渠管設計，重會宣布新措施加強渠管嘅耐用性。睇嚟日後買家睇現樓，都會多一個例行動作，就係伸頭出窗外睇渠管狀況。
政府商舖帶頭減租，房署商場租戶負擔稍為減輕，但各大私營商場業主仍然無乜實際減租行動，不過，一啲由投資客持有嘅中小型商場，就老早已經減租，雖然幅度唔算大，但總好過無動於衷咁麻木不仁。例如一個喺東九龍某屋苑商場開舖嘅租戶話，早輪大業主已象徵式減咗佢幾百蚊，以佢個舖大概一百呎計，本來月租七千幾，減幾百好過冇，起碼心理上有雪中送炭嘅感覺，尤其小本經營嘅舖頭仔，月租可慳幾百都冇咁傷。
疫症肆虐，市民出入公眾場合都特別小心，睇樓活動當然唔例外，各大發展商清潔工夫做到足，地產代理亦喺售樓處派發同健康有關嘅禮品。
中原就喺海堤灣畔售樓處，派發健康禮品包，入面除有消毒濕紙巾外，重準備埋尺、記事簿及鎖匙扣，注重保健之餘，亦冇忽視買樓嘅必需品。另外，美聯就顧及食方面，於同一場合派發生果。市民攞完濕紙巾抹手，過隔籬就有生果食，認真照顧周到，唔知兩大行事前有冇夾過呢。
口罩、手套同消毒火酒「防炎三寶」，近期大受市民歡迎，逛商場、參觀示範單位等人多嘅地方，一定唔少得佢哋。蘭西噚日到屯門愛琴海岸，除見到有防炎三寶提供外，發展商重準備咗大量健康飲品花旗參蜜，派畀參觀過現樓示範單位嘅人士，飲品解渴提神、養陰清熱，多飲有益，但係要增強肺部功能，常做運動先係上策。不過，負責派飲品嘅工作人員就好怕醜，唔肯上鏡。
蘭西
電郵地址：
