近排麥浚龍（Juno）頻頻拍攝新歌MV，拍完《玩得》、《發高燒》同《污點愛人》之後，Juno又同無綫Covergirl冠軍阿Gess拍攝《有話對你說》嘅MV，幾乎忙到冇覺好瞓。原來Juno呢排因為非典型肺炎問題，所以取消咗好多工作，唱片公司同經理人嗰邊見Juno得閒，咪索性叫佢拍晒啲新歌MV，唔使遲吓將啲工作堆埋一齊嚟做。
話說拍攝《有話對你說》嗰日，導演忽然要女主角阿Gess錫Juno面珠一啖，由於佢哋從來冇試過拍錫人或者俾人錫嘅場面，所以一時間搞到好鬼尷尬，雞手鴨腳唔知點做，好在有導演從旁指導，如果唔係拍到天光都未拍得完。不過，因為阿Gess始終係新人，唔識得就位，喺佢伏落Juno嗰陣時，竟然唔覺請咗Juno食波餅，有口痕友講笑話莫非今次係新歌大贈送？
佘詩曼噚日出現無綫將軍澳廣播城，對於有報道話佢承認陳浩民係半個男友，佢話：「我都冇咁講過，我哋關係冇變，都係好朋友。我呢排忙緊拍《西關大少》，同好多前輩合作，我要好專心咁拍。」有傳聞話馬浚偉唱衰阿佘，阿佘就話冇親耳聽過馬浚偉唱衰佢，所以唔會相信。
葉文輝（啤梨）噚日喺尖沙嘴拍攝音樂特輯，佢重搵咗Juno同薛家燕（好姨）客串外賣仔同唱片監製嘅角色，啤梨話拍完晒成個特輯之後就會請一班朋友食番餐。本來啤梨都有諗過搵嘉碧儀客串，但由於對方啱啱喺美國返嚟，加上又要過無綫好多關，所以最終都打消咗。
安雅同台灣藝人鄒少官日前被發現一齊喺台灣通化街夜巿出現，台灣記者收到消息後，就即刻打電話問鄒少官，佢用國語話：「我們很多人在一齊，不是單獨吃飯，我們認識了四、五年，大家是很好的朋友，因為我以前都在外國住過，所以我們是用英語溝通。」
無綫《唱談普通話》嘅女主持利嘉兒，噚日喺紅磡漁人碼頭出席「普通話地帶」活動。
利嘉兒早前被本報拍得同男友喺街頭拍拖照，佢噚日直認感情生活愉快，利嘉兒話：「我同男友拍咗幾個月拖，平時都冇避忌，街坊都認得我，不過戀情曝光就畀男友一定壓力，因為佢唔係圈中人。」
電影《無間道前傳》本來預計下月開拍，點知劇本到𠵱家都未搞掂，預算喺暑假上映嘅如意算盤都打唔響。點解個劇本搞咗大半年都未得？因為珠玉在前，之前《無間道》口碑咁好，搞到導演劉偉強壓力好大，新劇本寫完又改，𠵱家都未搞掂，不過參演嘅演員，好似黃秋生同陳冠希就好睇重部戲，寧願等導演慢慢搞，又唔介意改其他電影嘅檔期嚟遷就。
