近排汽車市道低迷，政府救市方案又幫唔到本地嘅汽車業，響咁嘅情況下，惟有自救方能解決目前困境；而亞Mark早前就聽到個好消息，話日本汽車代理嘅老大哥，皇冠車行嘅崔志凱先生，就曾經響復活節假期前搞咗個飯局，應邀到臨嘅人士可謂份量十足，分別有大昌行嘅許應彬同麥烱添，又有森那美集團嘅李之盛，單係佢哋四位猛人，就幾乎可以代表晒香港一眾日本汽車代理商。據知，席間崔Sir提出響呢段艱難日子中，祈望各家日本汽車代理，唔好搞減價促銷，以穩定目前疲弱嘅汽車市道。雖然及後各家代理均能信守承諾，但亞Mark最近卻收到風，話早前傳出裁員以圖精簡人手及減低開支嘅大昌行，有可能響月底前向全體汽車部員工，提出另一次減薪方案以共度時艱；亞Mark但願減幅唔好咁多，最重要係人人有工做，並祈望本港車市能回復有如圖中一樣繁盛。以下亞Mark列出部份日本車響復活節期間嘅一周賣車數字，好等大家了解目前車市境況。