港股連跌5日，亦係連跌5周。自從美國打伊拉克後，碰上非典型肺炎，港股陰落去，上周收8409，已破上月同01年911低位，返到去99年初水平。悲觀嘅睇法，甚至有機會跌落98年政府入市之低水平。
暫時，八字大關始終係一個大關，估計會先守一下，或者唔需要下試呢個位。港股𠵱家唔係點理外圍走勢，最緊要睇疫情點變化。北京情況仍然惡劣，廣東省每日新增個案只係個位數字，本港似乎亦開始穩定。專家意見紛紜，有啲認為高峯期已過，若然係咁，就上上大吉。
有疫情呢啲變數喺度，窩輪市場好難一面倒直線向上或直線向下，最好靈活做嘢。今日咁睇，明日可以調轉頭嚟睇。
賭市上落，最直接做法自然係買賣恒指窩輪。諗住會彈番上去之時，買Call輪，對象係9723同9767，諗住會俾人踩多兩腳之時，買Put輪，對象係9775同9806。
國泰（293）壞消息一籮籮，上周只跌0.30元，未跌夠，跌多過升，Call輪9810呢幾日走勢硬朗，追唔過。太A（019）情況亦唔妥，跌幅雖大，估計反彈後亦難以持續，Call輪數據唔靚，冇乜值博率，應避開。
章盛