經紀黃上周提過亞洲鋯業（395）同埋中國稀土（769），雖然佢估中亞鋯業績靚，盈利超過預期，升咗3成，但股價就係咁跌，上周五重跌穿1元水平，收0.98元。
經紀黃噚日請小初食飯道歉，重話家陣個市唔多正常，經常將好消息當壞消息炒，唔知係咪𠵱家肺炎當道，無論基金經理同普通散戶都係無心戀戰。
至於中國稀土，經紀黃在基金經理嗰度收到風，據講事件比原來估計麻煩，原來中國稀土唔單止延遲公布業績，而且新委任嘅核數師，上場不足1個月就辭職，辭職理由同之前唔同，唔係收費平貴嘅問題，而係好似在帳目上有分歧意見。
相信最令投資者唔開心，就係新委任嘅核數師辭職後，中國稀土仍未搵到人頂替，隻股短期內將難以復牌，無法買賣，到復牌時，真係唔知會變成乜嘢光景。
慕容小初