與其坐困愁城，不若苦中作樂。沙田昨午跑女皇盃國際賽，八方見近來馬場人少少，就入場碰吓運氣，捧捧勇冒回國被隔離危險嘅日本騎師場。結果隻「榮進寶蹄」果然蟬聯冠軍，八方亦執番少少Win。
呢隻「榮進寶蹄」已四度來港搵銀。前年十二月，佢參加香港一哩錦標勝出，奪得八百萬獎金。去年四月首奪女皇盃，重贏得一哩賽同女皇盃連贏特別彩金，一共得到九百萬。八個月後，「榮進寶蹄」來港參戰香港盃，雖然只得第五，亦有六十萬。至於噚日成功衞冕，又有八百萬。三年來四戰三勝，一共在港攞走二千五百六十萬，難怪SARS咁兇猛佢都冇有怕。
蔡惠宏醫生隻打吡冠軍「勝威旺」跑第二，馬會主席夏佳理自己隻「駿河」就跑第四，都算為港人爭番啲光。夏叔今次請咗終審法院首席法官李國能去點睛兼頒獎，八方記憶中，大法官好少去馬場做呢類騷，回歸前女皇盃頒獎，由肥彭負責，現在大概有人怕政治不正確，加上時局唔好易招閒話，所以要勞動大法官。
（圖）大法官李國能（右二）喺戴上黑超嘅夏佳理陪同下點睛，夏主席自己隻「駿河」最終只跑第四。
譚日華攝
傳真︰2623-9278
電郵︰