香港啲家長與教師俾教育署寵壞咗，樣樣都要問攞指引，兒女返學，探吓熱都話冇時間，若果真係家境困難嘅，都話講得通，但打電話去電台嘈生晒之人，係唔係真唔掂呢？唔係幾信。一啲教師校長更冇理由，叫學校復課，起碼有一半家長贊成，際此非常時期，人人要多走兩步，點解猛要complaincomplaincomplain呢？校長教師之中，好多都起碼有兩個學位，讀咁多書，使唔使下下賴教統局唔畀指引先識做嘢呀？
官校津貼學校樣樣有公帑支持，其實在目前環境，已非常幸福。譬如左丁山等馬迷常常去馬場捐錢，馬會代我哋做善事，現在又撥款一億元資助全港學校進行校內清潔，慈善信託基金將每月向全港中小學提供資助，直至本學年結束為止。呢個「校園衞生、上學安心」會向全港中、小學（牟利私立學校除外）每月資助二萬元，用以加強清潔工作，增聘清潔員工等等。
私立學校就杰咯，冇政府畀錢，冇馬會資助，學生停課就要求退回學費。左丁山一個朋友在設計課程學校工作，佢話每科收生收費，原本都唔錯，突然間發生「沙士」，於是停課，學生立即要求回水，退學，但另一方面就要加強學校消毒清潔，增加支出。牟利喎，唔蝕到暈已經偷笑，朋友係設計師，冇工開就喺學校兼教兩科，現在冇學生，佢即係冇收入，佢都唔知幾羨慕啲公帑支持嘅官津補貼學校校長教師，因為佢哋樣樣有教育署照住，無風無浪等出糧。