自從SONYERICSSON部T610曝光之後，羅新基就成日俾人問幾時有得賣，有個朋友等唔切，甚至買咗部T310頂住先，話T610出嗰陣，放咗部T310換部機王咁喎。羅新基最近就收到風，呢部機王五月中就會開始派貨落場，而價錢傳聞會三千到尾，咁羅新基都係時候儲定錢恭迎呢部機王返屋企喇。
Nokia隻藍芽耳筒落咗手機場都係兩個禮拜度，早幾日羅新基就見到場價只係賣緊$750，有啲重接近$700蚊㖭，當日水貨初到埗時賣成$880㗎，估唔到出咗兩個禮拜就跌成百幾二百蚊，呢個耳筒細細部，個樣都幾型仔，個價同好多港產或台產嘅藍芽耳筒差唔多，話晒都係Nokia，想買嘅係時候入貨。
三星自從部S308同T408之後都好似靜咗啲，不過今日就會有新機返，就係扭擰影相王P408，最特別就係鏡頭用CCD，並非一般影相手機嘅CMOS，影像效果就更加正，而40和弦、GPRS同65,536色螢幕就一定唔少得，估計大概賣$4,000至$4,500左右，有興趣就不妨落手機場昅昅。
文：羅新基