自從董建華被迫棄用家臣路祥安之後，佢喺特首辦內最信得過嘅人，就係剛獲提拔為高級特別助理嘅陳建平。有人甚至形容，阿董信任佢重多過眾問責官員。
陳建平，何許人也？佢原來同八方一樣，記者出身，但佢當年效力《文滙報》，用支筆搵食，而八方就攞住支咪周圍走，靠把口食飯。
大家當時都估，呢位來自廣州、鄉音未改、溫文有禮嘅行家一定係共產黨員，因為佢一直獲得栽培，由跑財經新聞，到轉跑政治，《基本法》起草，至後來長駐北京，陳建平都予人永遠政治正確嘅感覺，佢同當時嘅港澳辦主任魯平私交甚篤，都係多得採訪《基本法》，日夜見面所賜。
當然，六四令到最忠誠嘅黨員都受到考驗，但係陳建平最後都重拾心情，繼續工作。或者佢同香港問題已經結下不解之緣，回歸後，佢俾魯平安插喺老董身邊，做中國問題專家兼政治顧問，幫手搭通國內天地線。
其實香港同大陸嘅官場都不好搞，既然得老董信任，就請建平兄多畀好意見老董去應付SARS，叫佢老人家決斷英明啲，做嘢快啲手。又係個句，今次不同八萬五，人命關天。
（圖）陳建平（右）取代咗路祥安（左），成為特首辦內阿董最信得過嘅人。
傳真︰2623-9278
電郵︰