新款MP3Player不斷爭相湧出市面，主因除咗開發成本極低外，改改外殼又係另一部新機，最重要係永遠有一班喜歡追新嘅用家，佢地認為未睇功能同價錢，有型搶眼彷彿才是首要考慮。韓國LG及JNC今番再下一城，機能普通不過賣相一流，貫徹始終，恃靚行兇。
記者、攝影：徐影龍
ImageGirl：Beatriz
捷訊科技查詢電話：29262250
逢星期一至五刊出
支援格式：MP3及WMA
記憶體：128MB
播放時間：6小時
錄音時間：9小時
體積：60×60×12.5mm
潮流興鏡面設計，由DVD影院組合，到電腦機箱、甚至GAMECUBE兼容機「Q」，都以平滑鏡面示眾，令鏡面成為新一代搶眼指標。韓國名牌LG就新推出一部MP3機仔MF-PD390，四方外殼基本上跟傳統MD機孿生一樣，不過最搶眼係採用鏡面式設計，光滑閃令夠晒高貴，不論前衞型人或斯文人都咁受。不過由於MF-PD390屬流動式裝置，唔似DVD機咁長擺一個地方，變成好易會刮花機身，而且花痕特別明顯，自問錫機者先好考慮入貨。機面之特大屏幕亦值一讚。除藍光背景燈外，亦支援雙位元字符，中、日、韓文歌名顯示完全冇問題，而且屏幕夠大睇得好舒服。
機能方面，MF-PD390只算不過不失，內置128MB記憶體約可儲存32首標準MP3或WMA音樂，本來已屬不錯配備，可惜不設擴充記憶插槽，不能「換卡當換碟」，另外對扮演一部外置式儲存裝置，作抄寫資料亦有限制，呢兩點舊機嘅落伍設計不禁令人有點失望。較為可取係現場收音功能，128MB記憶體最多可錄到9小時聲音，作課堂記錄或開會之用都得，算幾長氣，聽歌以外總算有點實際用途。使用電源只需一粒3A筆芯電，便可連續播放6小時音樂，足夠一天之用，補充上亦比專用鋰電方便得多。
抵讚
鏡面設計的確吸引，9小時錄音亦夠長氣。
要彈
不設外加記憶卡作擴充，單靠其內置的128MB，容易「周轉不靈」。
支援格式：MP3及WMA
記憶體：128MB
播放時間：13小時
錄音時間：9小時
體積：80×29×16.5mm
重量：35g
另一韓國牌子JNC亦有新機上市，呢部型號為SSF-80嘅MP3Player，最大賣點同樣係以貌取勝，長方機身加少少流線型，傳統得嚟又唔會太悶，最正係分為藍、紅兩色機身，配襯銀色機邊好Sharp好靚，加埋藍光屏幕背景燈，擺到明打一對對拖友市場。
機能方面，較特別有「ImageEditor」功能，可下載或自製圖案到機內，成為獨一無二嘅MP3Player。其他機能居然同之前嘅LGMF-PD390有九成相似，包括內置128MB記憶體、9小時錄音、支援多國語言及採用一粒3A電等，連唔支援外加記憶卡嘅缺點都照跟，唔通𠵱家流行呢啲規格？
抵讚
紅、藍機身配銀色邊幾型，年輕人啱睇。
要彈
線控耳筒設計簡單、不支援外加記憶卡。