郭富城和內地演員李冰冰合作內地劇集《動感豪情》後傳緋聞，又有傳城城因為人氣跌，原定七月在紅館舉行的演唱會被迫臨時取消。但城城的經理人小美表示，城城因有其他工作，所以演唱會押後舉行。看來城城可全力追求李冰冰。
郭富城、王喜、內地演員李冰冰和韓雪等，前晚在海洋公園拍攝內地劇集《動感豪情》，四人還即場放氣球為香港祈福。
城城在劇中扮演一名富家公子，但一夜之間卻失去所有，事業陷入低潮，城城對此感同身受說：「我同娛樂、電影同飲食業都有關，其實非典型肺炎對各行各業都有一定影響。」
早前有消息指城城力追拍檔李冰冰，城城說：「我喺劇中係好鍾意李冰冰，我只係鏡頭前鍾意佢，但鏡頭外，我覺得大家係好朋友，李冰冰係內地演員，我係『動感之都大使』，邊個嚟香港都希望可以賓至如歸，我同李冰冰食過飯，當時都唔係燭光晚餐，而且大家各自有助手喺現場。」
問城城對李冰冰印象如何？他說：「佢係個率直同好純嘅女仔，我覺得佢對眼好靚。」李冰冰曾表示喜歡劉德華，那城城是否要與華仔拗手瓜？城城說：「我都有問過李冰冰係咪喜歡華仔，佢係欣賞對方嘅工作態度啫。」李冰冰亦大讚城城：「佢心態好青春，好有活力，華仔同城城兩個都好，佢哋都有教我廣東話。」
此外，近日有傳城城因人氣勁跌，而取消了七月在紅館的個唱，他聽罷即表示要埋位開工，並交由經理人小美代答，小美勞氣地說：「乜嘢叫人氣跌？日日喺街大吵大鬧就人氣高，城城唔係人氣跌，如果七月做演唱會，下月底就要準備，但城城下個月接咗新戲，我唔想佢負擔咁重，𠵱家暫定年尾再開。」
採訪、攝影：汪正文