已經篤定降班嘅新特蘭，上周六喺光明球場又再輸埋畀紐卡素，計埋呢場已經係連續第十三場英超聯賽事輸波，破晒英超同自己球會嘅羞家紀錄，對班新特蘭忠實擁躉來講，絕對係哀痛嘅沉重打擊，真係向支持嘅球迷道歉都嚟唔切，難怪坐喺後備席上嘅領隊麥卡菲好多牢騷。
鬼咩，我求大俠一向認為，踢波呢家嘢，淨係搏命係唔夠嘅，欠咗啲有經驗球員壓場總係差啲；呢個時候新記起用咁多新人，唯一答案係博有驚喜；下半場佢哋重出件年僅十八歲、樣貌十分稚氣嘅賴恩，暫時嚟講，驚喜就冇嘞，博佢反彈嘅波友就只有搖晒頭歎息激氣啦。其實睇新記出嘅人腳已經知道班波對餘下賽事係咁先，佢哋重有作客維拉同主場對阿仙奴就收爐；波友，你哋識買新記對家啩！
韋斯咸件門將占士已經係五件細路嘅父親，日前俾《世界新聞》狗仔隊影到佢揸架寶馬開篷跑車去小學同學艾曼達嘅娘家幽會；據講，占士同艾曼達係「全職」同居關係；嗰位緋聞女角向閨中密友講，佢同占士的性愛非常狂野，唉！唔怪得占士今屆把關失咁多波啦！
利物浦突然發神威，件奧雲仔重四喜臨門㖭，至今已經入咗十九球，真係估唔到佢臨尾重有啲機會挑戰英超射手榜以二十三球領先嘅亨利同比亞堤。我求大俠覺得，呢啲唔係奧雲特別醒，係對手西布朗特別差啫；西布朗餘下對布力般同紐記，相信對家射手又會有驚喜
西甲老牌球會巴塞隆拿今季始終冇突破，淨係喺歐冠盃威過一輪；但去到八強就跪低；𠵱家喺本土聯賽重要爭歐洲足協盃席位，但件主將沙維在歐冠盃時又傷埋，餘下賽事唔使預佢。我求大俠覺得巴塞要重振雄風，一定要學皇馬咁識得揼錢買超級球星，如果唔係，喺中游地帶繼續游啦！
無緣打季後賽嘅「明王朝」姚明，噚日朝早坐飛機由美國飛抵老家上海，因國內為預防「沙士」擴散，所有入境嘅人士都要接受體溫測試，「國寶」姚明都唔例外。經過測試後，姚明嘅體溫只有三十五點九度，比較正常嘅三十六至三十七度重要低，連「明王朝」自己都好意外。不過低溫重好過高溫，起碼證明自己冇「中招」嘛！
啱啱成為WNBA新人遴選第三選嘅爵士老將馬龍嘅愛女卓莉，噚日專登去捧老竇場，喺愛女打氣下，「郵差」睇嚟打得特別生猛。同日又撞啱爵士大老細拉利米拿慶祝五十九歲生日，喺雙重沖喜下，唔怪得爵士，最後可以喺主場爆冷打敗帝王啦！