「蕃薯苗小館」嘅老闆梁國智和何鎮泉係兩名喜歡周圍搵食嘅好朋友，兩人都有正職，得閒坐埋一堆嘅時候，都喜歡談論飲食，有彈有讚，兩人同時講起，不如自己開一間菜館，睇吓人哋幫襯過後，又會唔會好似《蘋果》咁成日彈人哋囉！如果俾人彈到一文不值，無生意時，咁咪當做玩一鋪昂貴嘅遊戲，就咁樣就開咗間舖。
記者：黃思濃
攝影：楊錦文
梁國智話：「我哋開業嘅時候，抱着自嘲嘅心態試吓啫，並無寄望可以玩到咁耐，所以就改名做『蕃薯苗』，即係好脆弱，又唔出得大場面咁解。喺設計菜餚時，好似作文咁，要切題，就諗到用番薯苗同豬肉攪拌做餡包水餃，諗唔到竟然頗受街坊食客支持，成為一道『憶苦』美食。」
現今好多事業有成的香港人，好多都係游水或攀山越嶺偷渡來港，梁生話，他們吃水餃的時候都會想起一段段的故事，當下的富裕就是建立在當年的番薯葉、番薯藤上，可以說是靠它們才會造出今日的好日子，如今香港經濟咁差，相信亦只是另一個谷底，他深信，到此懷舊一番，憶苦思甜，往後總有好日子過！
梁老闆介紹了一味甜酸嘅菊花魚美食和紅燜牛腩菜飯。他說如果要用舟山群島一帶水域出產粗壯如碗口的黃花魚烹調菊花魚，現在很難食到，用桂花魚或鯇魚，似乎又太普通，何老闆就提議用新西蘭龍脷柳，蘸汁除了番茄之外，再加啲青蘋果汁，既好睇又酸酸甜甜，魚肉無骨刺，啖啖肉，食落同三、四斤重嘅黃花魚有啲近似；至於牛腩菜是一道經過改良，既美味又可飽肚嘅客飯。何老闆經營凍肉生意，識得精挑細選，專買美國牛肉，又要揀正牛胸肋骨對落嗰塊肉用來燜，真係走遍港九好多食肆都搵唔到。
何老闆與梁老闆兩人都係老廣，菜館菜餚卻以北方食物為主，兩人都異口同聲說：「好多外省人都嚟幫襯，我哋呢啲『翻版』上海菜，三年嚟已經獲得好多食客認同，上年香港旅遊協會又頒咗張優質證書畀我哋，真係好大嘅鼓舞。」
其實上海菜館，少不了兩味菜：雲吞雞和擔擔麵。前者用新鮮雞，菜肉雲吞，濃湯用金華火腿，咁至夠味；擔擔麵就好注重醬料，食時要多少辣可以自己調配，但係其他種配料一樣都唔少得，例如芝麻醬、香醋、醬油、上湯、蝦米碎、肉碎、蒜茸、辣油等。
前後去過三次呢間菜館食飯，都睇到有啲媽咪唔想煮飯，就拖住兩個細路去幫襯，亦有其他同行去試食，希望可以吸收到經驗，佢哋注重品質，實事求是，名副其實係優質嘅保證，點會俾人踩？
蕃薯苖
電話：28872728
地址：北角道17號
用新西蘭龍脷柳做菊花魚，配上番茄和蘋果汁煮的蘸汁，淋喺剛炸得香脆嘅魚身上，可謂酸、甜、脆、嫩、香兼備，千祈唔好拖慢嚟食，熱辣辣食時味道最好！
爽脆纖維質量高
名副其實的招牌菜，番薯嫩苗爽脆，攪拌在豬肉餡料中，油水充足，纖維質量高，從未試過有如斯新穎的口味，而且是健康食品，值得推介。
改良版好飽肚
上海人煮菜飯，一般係將切碎嘅青菜和洗濯過嘅米一齊煮，米飯有菜味，青菜卻已稀爛，損失營養。呢間菜館就改良先煮菜，再攪拌飯一齊加溫，這樣就可以保留青菜嘅營養，吃一餐菜飯好飽肚。
湯底濃帶微辣
浸喺上湯裏嘅麵條，上層浮着八種配料的醬汁，食時撈勻，湯底濃郁，且帶有微辣，加上麵條不似其他食店般煮到一嚿嚿，食落唔會黐牙。
經典上海菜
一味地道的上海菜，用金華火腿煮嘅濃湯，鹹香加上雞嘅鮮味，再夾菜肉雲吞，味道一流。