十七歲嘅上位日本少女藤本美貴，學足同門松浦亞彌同Morning娘嘅模式，早排推出佢嘅處女寫真集《Aloha!藤本美貴》，用無限量嘅比堅尼水着同夏威夷風景攻陷fans。
我羅拉睇完之後，覺得藤本表情頗為生硬，成日有意無意用手腳遮住重要部位，唔通佢自覺身材同松浦差一截，所以藏拙？之後我八到，雖然藤本出道年幾嚟，成日俾人傳佢係豪放飛女，但出身北海道嘅藤本，自從小學之後，莫講話比堅尼，連一件頭泳衣都未再着過！今次要藤本大解放，起初都好抗拒，不過始終寫真集對增加人氣好有幫助，所以藤本先肯露少少，真係估唔到佢原來咁鬼保守。
我羅拉又聽講藤本呢一年嚟，俾人當廉價勞工咁用到盡，成個人殘晒，撈得唔係幾開心。佢公司知道之後，特別安排佢舉行巡迴演唱會，聽日喺北海道做最後一場，藤本知道有機會見家人後，一直咬實牙關咁做落去，呢啲咪就係藝人嘅辛酸囉！