關於「沙士」病，讀者好有興趣討論。其中兩位話要捐錢，問左丁山點進行。讀者S話睇報紙知道某位孕婦產子後，因沙士病逝世，令人十分難過，想話捐一啲錢，聊表心意。不過左丁山不知孕婦姓甚名誰，佢嘅家人亦未必想曝光。讀者S呢番心意，值得尊重，不過左丁山抱歉幫唔到你。
另一位讀者周話從本欄得知中大中醫藥研究所所長梁秉中教授研製防「沙士」中藥配方，醫管局冇錢畀，周先生話：「本人深感當今危難時期，願就經費資金盡點綿力，未悉從何着手，謹望先生提供有關情況，並代為引薦。」呢件事當然樂意效勞，已將周先生嘅電郵轉送梁秉中教授。中大中醫藥研究所本來冇乜錢，不過得到余仁生幫忙，生產四萬包中藥沖劑，派畀醫護人員服用，可能遲啲就會推出市場，以接近成本價發售。
各區大廈都有住客染上「沙士」之後，衞生署受各方壓力，卒之公開大廈名稱，於是我哋發覺大埔成為重災區，至於為何如此，冇人知道。但大埔居民確係須要提高警惕。一位讀者Angus就來函反對，認為無論公佈與否，大家都要「高一級水平防範」，毋須等到「榜上有名」，先至提高防範水平，而且公佈大廈名稱，鼓勵「逃亡潮」，令「沙士」巡迴各區。Angus嘅論點不成立，譬如話至今未有病例，唔通你會假設淺水灣居民會降低「防範水平」咩？左丁山居住附近，亦冇大廈中招，但自己日日都加緊防範，唔會睇完張名單就自動鬆懈嘅。至於「逃亡潮」，言過其實，香港地方細，走得去邊？親戚邊度有地方招呼你呀！