阿B破產後，女友范姜素貞一直默默支持他，二人也不像以往般避忌公開亮相，阿B說：「一齊經過咁多嘢，冇必要重閃閃縮縮，佢以前好怕面對鏡頭，𠵱家慢慢習慣。結婚就唔使再問我住，我𠵱家憑乜結呀？又唔係未試過，最重要係一齊過得開唔開心啫。」
至於一對寶貝仔女，阿B笑說：「對仔女大得好快呀，個仔都變聲咯，感覺好奇妙，反而係我睇到個仔咁大個，離長大成人不遠，係我自己唔慣。個女𠵱家六歲，識得貪靚要減肥，重做埋追星族㖭，佢好鍾意Sammi（鄭秀文）㗎，得閒唔係睇《瘦身男女》就睇《孤男寡女》，不過好彩，你問佢鍾意邊個男artist，佢都會話爹哋囉，冧晒，唔使我呷Sammi醋。」
而阿B與李萬祺頗友好，二人現時都過着破產生涯，李萬祺更與太太余安安離婚，阿B說：「我哋識咗好耐，大家成班朋友有時約埋一齊飲嘢傾偈，不過都係風花雪月，我哋冇特別傾乜嘢破產心得喎。佢離婚我就唔知呀，邊有問人咁深入嘅嘢㗎！」