認頭護養一棵古樹、樹旁又有你個大名嘅牌匾擺喺樹旁要幾多錢？三年只需六萬八，五年要八萬八，八年就要十八萬八。噚日「一人一樹為公益」之「名樹護養計劃」進行致謝儀式，特首夫人董太去咗做主禮嘉賓。
董太次次出嚟都鍾意致辭，唔知係咪因為上次全副武裝去牛頭角下邨淪為國際笑柄，今次董太異常低調，一身黑衫黑褲又冇戴口罩，重罕有地冇致辭。不過有A1，又點少得蝦碌鏡頭？
非典型肺炎肆虐，衞生署宣傳片都有叫人「少握手」，但係董太唔識死，向十五位認養名樹嘅善長仁翁頒感謝狀時，頻頻伸手想同人握手，點知遇上對方雙手抱拳，慘食檸檬；到董太改為抱拳，人哋又伸出隻手，總之好笑過睇搞笑片。不過每次雙方都係以握手作結束，咦？董太咁唔衞生，咪即係公然漠視衞生署嘅呼籲？
董太跟手行去參觀兩棵有四百幾年樹齡嘅「棗樹」，不過佢又講錯成「紅棗樹」，要由隨從即刻細細聲糾正。呢兩棵樹係四月十日河南省新鄭市政府贈送畀特區，放喺香港公園嘅。
傳真︰2623-9278
電郵︰