家陣全城抗炎，各大機構唔係送口罩就係湯水，真係人間有情。不過，亦有商人趁機發肺炎財，好似百佳，竟然將一度奇貨可居嘅板藍根，賣貴過其他舖頭四倍半咁多！
有市民睇唔過眼向八方報料，話之前每包十蚊左右嘅百草堂板藍根沖劑，今個禮拜突然賣貴咗三倍，要成二十五個九咁貴，令呢位熱血市民不停咁鬧。代理商話，呢隻沖劑批發價不過四蚊至六蚊左右，有間小型超市零售價都只係六個半。
百佳發言人就話從未試過賣十蚊咁平。八方前日親自去睇睇，見到呢啲沖劑賣到三十五個九一包，重要喺價錢牌貼住三個「抵」字，轉頭特價咗都要二十幾蚊，百佳啲格價專家唔知去晒邊呢？
﹙圖﹚八方前日見到百佳賣嘅呢款板藍根沖劑要$35.9一包，雖然轉頭減到$25.9，但都比出面貴幾倍。
傳真︰2623-9278
電郵︰