英國萬人迷球星碧咸（DavidBeckham）嘅歌手嬌妻Victoria，自從九十年代以SpiceGirls成員身份晉身樂壇之後，佢嘅體形真係愈嚟愈纖瘦，連我羅拉都愈睇愈驚。不過Victoria最近接受美國ABC嘅新聞節目「20/20」專訪時話，佢真係冇罹患厭食症或暴食症。
Victoria喺節目入面話，即使外界成日對佢體重急跌有好多揣測，但佢強調自己未試過有飲食失調嘅毛病，但係Victoria承認曾經試過幾乎患上呢啲病，佢呢個答案真係搞到我𢱑晒頭！Victoria又話相當關注自己嘅體重，直情去到沉迷嘅地步，任何食物嘅卡路里同脂肪含量，佢都可以一清二楚咁話你知。
不過其實碧咸一直都好擔心Victoria嘅健康，話說佢哋有一次出街食晚飯，俾記者影咗相，第二日碧咸就問Victoria有冇睇過張相，因為段新聞嘅標題寫住「骷髏骨辣妹」！亦難怪碧咸有咁反應嘅，早幾日我見Victoria抱住細仔羅密歐（Romeo）去參加大仔布魯克林（Brooklyn）完成短期足球課程嘅畢業禮，大家企埋一齊，着住波衫嘅布魯克林，睇落啲肉重多過佢阿媽，真係陰功！另外Victoria喺訪問度亦話，綁架事件後佢出街唔可以冇保鑣跟住。