唔知係呢排個市跌得太低，抑或係班卜架太過靜嘅關係，喺每朝入競價盤嘅時候，總會發現有好幾隻股份嘅價格俾人舞上舞落，而且重唔係啲大牌嚟㖭，就好似上個星期四咁，和黃（013）喺開市前輸入競價盤時段，就曾經俾人由42蚊舞到落去30蚊，不過去到臨期指開市時，個價又回復正常。
到咗星期五就更加離晒譜，和黃唔單止俾人抽咗上去50蚊，連長實（001）都俾人郁埋。雖然話喺競價盤輸入時間可以自由輸入買賣價，但係個價波動得咁厲害，搞到班散戶無晒方向感，如果「烏龍」起上嚟，唔理價照沽，又或者唔理價買貴咗，到時應該入邊個數呢？真係唔明交易所班人點解會俾啲咁嘅事發生。
唔知啲股價波幅擴大係唔係會好似隻SARS咁，會傳染開去嘅。個市唔單止有好多隻大藍籌勁俾人插而大幅波動，就連一啲早前走勢幾好嘅二三線股都郁得好緊要，好似隻海爾中建（1169）咁，聽講話有個倉要沽貨，結果就唔理價咁俾人掟出街，好多諗住跌唔穿支持位嘅散戶自告奮勇出嚟接貨，都一一被車低，結果一日就俾人劈到唔見一成三有多。
雖然有行家話，今次隻股份係班大戶自己隊低自己，要升番上嚟一啲都唔難，但係個市咁差，都係小心啲好。
另一隻早前俾裕豐（965）拖累嘅奧瑪仕（959），雖然避過清盤嘅危機，但個價就俾人舞到七彩，聽講有個大戶早前將好多呢隻股嘅貨按咗畀某間證券行，今次隻股唔使死，都算係救咗佢哋，因為一旦清盤，就連個殼都冇埋，到時唔知要炒幾多人至可以填番條數。
伏勝