馮仁昭見咁多圈中是非之中，郭羨妮同馬浚偉有冇拍過拖呢單嘢，都算係婆乸兼長氣，講極都唔完。前晚郭羨妮同真命天子溫兆倫喺君悅食飯，今次係佢哋傳情變後首次露面，見佢哋十指緊扣，不知幾恩愛，一方面用行動闢謠，另一方面又可向馬仔示威。不過一提到馬仔，郭羨妮即時封口話：「都過咗去，我唔想再講。」
問溫兆倫有報道指佢喺化妝間向工作人員力數馬仔，溫兆倫前晚就話：「sorry，我今晚嚟食飯咋。」馮仁昭記得郭羨妮同溫兆倫未拍拖前，曾傳過不和，話女方笑溫兆倫老套。前晚溫兆倫着住條高腰牛仔褲，摺幾摺褲腳配對黑皮鞋，恤衫重要攝埋入褲頭，認真慘不忍睹！睇嚟郭羨妮嘅品味重未薰陶到男友。
另外，陳淑蘭噚日同曾國銘喺金鐘出席蘇富比拍賣時，蘭子就力撐馬仔為人，佢話馬仔係祁文傑好友，平時都冇乜喺佢面前講是非。
張慧儀噚日喺紅磡出席「金觀音平安祈福大會」，張慧儀話自己信奉觀音多年，最近肺炎肆虐，佢都有念經祈福，佢話：「我希望疫情可以盡快受控制，我以前喺馬拉都有念經嘅習慣，𠵱家做嘢忙，但得閒都會喺屋企念經，我同屋企人都唔食牛肉，男友嘅飲食習慣唔同，但佢都食少咗牛肉。」張慧儀又話非典型肺炎對佢同男友嘅婚事冇影響，不過佢哋會一切從簡，唔會鋪張。
噚日一班無綫藝員李克勤、洪天明、陳百祥同錢嘉樂等，去到九龍仔公園運動場同東華三院總理舉行一場足球友誼賽，而港姐左慧琪都有出席，結果TVB隊大勝七比一。不過比賽期間，東華總理隊其中一個隊員撞到克勤，事後克勤都好大方話碰撞成日都會有，兩隊隊員都搭晒膊頭影大合照。
張國榮過咗身都有一排，但各地嘅追悼活動就冇停止過，前晚日本新宿就齊集八百個張國榮嘅fans，一齊唱《風繼續吹》等歌曲同獻花，唔少日本fans到𠵱家仍然喊到收唔到聲。
而西城秀樹、谷村新司同陳美齡都有到場，西城秀樹話印象中張國榮嘅性格好樂觀，所以佢到𠵱家仍然唔相信張國榮會自殺咁話。
佘詩曼日前喺雜誌訪問中，承認陳浩民係佢半個男朋友，不過大家重係喺了解嘅階段。陳浩民𠵱家身在台灣，宣傳緊同阿佘合演嘅劇集《乾隆王下江南》，陳浩民噚日喺電話裏面，一聽到阿佘認佢做半個男朋友，即時開心到哈哈大笑，佢話：「有個靚女叫我做男朋友，我唔知幾咁開心，可惜我哋太少見面，希望我七月返嚟時，可以同佢好好發展。」
