係人都知熱刺同阿仙奴係世仇，所以熱刺今日主場對曼聯大可放水，等「兵工廠」爭標路更難行。但最弊熱刺領隊荷杜進軍歐洲希望尚存，到最後大輸家隨時係熱刺自己。
直到本輪英超聯展開前為止，熱刺只係相差第六位嘅愛華頓六分，以及第七位嘅布力般三分。而愛華頓之後重要對曼聯，熱刺亦有主場對布力般未打，照計熱刺會喺餘下賽事搏盡，來個「絕地反擊」。
若果熱刺今日真係成功搶到分，阿仙奴爭標路就會扭轉劣勢，難怪領隊雲格喺周中預備組對熱刺時，都走過去叫佢徒弟荷杜加油，幫手砌低曼聯啦！不過，我求大俠擔心熱刺之後兩場比賽無以為繼，到最後都係無得踢歐洲賽，又要睇住死敵捧盃，成為大輸家咋！
呢期球壇hottalk非碧咸可能轉會皇馬莫屬，西班牙嘅《阿斯報》、《馬卡報》講到似層層，睇怕呢單傳聞有排講。印象中，每次西班牙報章推波助瀾，噏得出最後都成事。好似當年安歷卡、費高同埋朗拿度去皇馬前都係咁。即管放長雙眼睇吓今次係咪一樣。
AC米蘭中場派路嘅膝傷無預期咁嚴重。佢堅持話響AC隊醫同埋實驗室幫助下，應該可以響收「咧」前復出。佢就講到個實驗室鬼咁好，不過我求大俠覺得，如果個實驗室真係咁掂，今季都唔會有咁多AC球員受傷。派路仔都係要靠自己意志好啲。
英格蘭非聯賽球隊唐加士打個老闆賴恩真搞嘢，佢響噚日對赫里福德聯嘅比賽充後備，若能上陣，將以五十二歲零十一個月嘅高齡，成為英球壇歷來年紀最大球員。呢場波輸贏都唔會影響隊波踢附加賽爭升班嘅資格，人老心不老，我求大俠服咗佢。
篤定喺今年NBA新秀狀元嘅勒邦占士，噚日宣布直接入NBA。不過就打死都唔肯講會簽邊間波鞋公司。其實佢十成九會過檔一剔牌啦！但一剔牌最近又斟緊高比仔，手掌又係肉，手背又係肉，呢次真喺唔知一剔牌點揀囉！
前日湖人主場對木狼場波，球證嘅執法惡評如潮。好似完場前吹薩比亞侵犯高比仔，俾湖人有機扳平，同埋加尼特喺加時冇耐就俾吹六犯離場，擺明偏幫湖人。噚日唔單止兩隊嘅球員一齊炮轟球證執法無能，就連NBA大老細史坦都罕有咁話球證吹得唔掂，球證應該好好檢討吓，唔好再喺啲咁重要嘅比賽亂吹一通累死人！