鍾鎮濤（阿B）正式宣布破產已有半年多，在這半年裏他努力工作，現在的他生活過得比破產前更充實愜意，更準備出自傳，大談與前妻一些鮮為人知的事情。
阿B坦言想像中的破產生活與現實是兩回事，他說：「一切在於你係咪正面去諗每一步路，時刻保持積極嘅心，我嘅情況係置諸死地而後生！」
鍾鎮濤去年十月宣布破產，過去半年他工作不斷，於紅館開演唱會、到台灣演歌舞劇及走埠登台等，稍後更要剃頭到北京拍劇，努力為生活拼搏。阿B今年亦計劃多多，最開心的是預計於年底再出唱片，他笑言未料到破產生活過得這麼愜意，感覺有如置諸死地後重生。
阿B透露未來工作大計：「我本來已經喺北京幫湖南電視台拍攝劇集《雍正與朗世寧》，我飾演雍正，要去半個月，重要剃光頭，但後來臨時話要換景，所以延遲五日先去，我唔知同肺炎有冇關喎。」
阿B覺得二十三年前他到台灣拍《小城故事》是一個開始，今日他到北京拍劇，亦算是新的一頁，因為此劇是他破產後的第一齣劇集，問他怕不怕北京非典型肺炎疫情嚴重？他說：「都幾驚㗎，不過我應該喺郊區拍，安全啲啩？𠵱家我唔可以完全安排自己嘅生活，係命運帶我走，要我去北京咪去囉，唔通有嘢做唔做咩？試吓囉，希望將來有個美好嘅回憶。」
阿B近日還與唱片公司斟洽出碟，並計劃出自傳及開演唱會，他說：「好耐之前已經有人搵我出書，但timing唔啱，今年我覺得係時候，出碟係有傾過，呢方面等一切落實再講。開演唱會係因為上年嗰個反應好，所以今年考慮再開，𠵱家未知點㗎！」
阿B的自傳內容將牽涉前妻章小蕙，問他怕不怕因此又惹事端？阿B說：「話明自傳，唔係只講某個階段嘅嘢，會係全面啲，我唔係寫日記自娛嘛，內容梗係寫啲讀者想知，或者從來冇人知嘅嘢，而且佢係對仔女嘅媽媽，冇可能夾硬當佢隱形嘅，不過出書嘅目的唔係傷害人，只係內容離唔開事實啫。」
雖然阿B推出上一張唱片已是六年前的事，但他始終最愛當歌手，他說：「嚟緊我諗住出國語碟先，出碟係我舊年嘅新年願望，今年先有機會達成，有心唔怕遲，呢個將會係我今年最大嘅收穫。之前我幫陳昇錄咗首《把悲傷留給自己》，由我同潘越雲合唱，收錄喺隻合唱碟度。我再感受番啲有唱片公司人員照顧嘅生活，比拍戲舒服好多。」
阿B續說：「我始終都係鍾意唱歌多啲嘅，𠵱家市道係好差，但都有百分之二十嘅碟係賺到錢，既然有老闆肯幫我出，即係有人對我重有信心，點解唔做呀？」
採訪：蔡如玉
攝影：陳慧安
