是日港股又跌，復活節後連跌4日，計埋假前最後1日，連跌5日。大隻嘢中，最醒係中電信（728）同中石油（857）。
中電信Call輪有4件，升得最勁嘅係9696，收14.4仙，升幅33%，有13球易手。成交最大嘅係9697，但收14.4仙，只係升得0.7%，有127球易手。表現相差幾條街，係因為上升之前，9696數據靚啲。經過昨日變化之後，9696（11月初到期）溢價7.7%，槓桿率10.3倍；9697（10月底到期）溢價與槓桿率同9696完全一樣。下一回合，應該表現相差唔大，但9697因為「冇升到」與交投活好多，可能會成為主角。正股歷史高位喺1.54元，買Call輪嘅話要留意個市唔好，正股唔易上破頂位。
中石油Call輪亦有4件，1件（9381）因為太價外冇乜成交，1件（9797）溢價過高而升幅（10%）跟唔上正股。主角係9361同9232。
9361今年6月夠鐘，升21%，現價13.8仙，溢價0.5%，槓桿率12倍。9232今年11月到期，現價12.1仙，溢價0.4%，槓桿率13.6倍。未來中石油Call輪，炒家焦點仍然係呢兩件。美國股神畢菲特揸中石油7.2%曝光後，中石油更加生猛，短期內餘勢仍在，呢兩隻中石油Call輪上便重有啲水位。
章盛