睇IHT報道，澳洲大堡礁GreatBarrierReef漁民最近十分索氣，驚住供樓供唔掂，點解呢？原來佢哋捉海魚、龍蝦等等，以香港為主要市場，四個禮拜前香港餐廳已經逐步減少訂單，購魚量幾近於零，令當地魚價大跌，澳洲漁民為之叫苦連天。
經濟全球化就係咁解，距離澳洲五千哩嘅香港發生SARS，香港餐廳酒店冇晒生意，立即影響澳洲漁民。鬼咩，公關靚女阿美話酒店生意慘跌，尖沙嘴最豪嘅酒店試過兩晚係零住客，金鐘靚酒店嘅入住率少過十巴仙，試問大家點捱。餐廳羅話PP（太古廣場）既冇酒店住客，亦冇本地遊人，所有餐廳生意大跌特跌，邊度會落柯打入澳洲海魚、龍蝦吖。
現在係執笠劈炮止蝕嘅最好時機，唔使同業主講理由，有良心嘅就剩番一啲錢，遣散晒啲夥計先至拉閘。其實呢個時候，早執好過遲執，捱多兩個月，連遣散費都蝕埋，實會變成無良僱主！至於拉閘關門之後，業主重會唔會收到租，真係一個有趣的問題。譬如灣仔老店「喜萬年」已經暫停營業遣散夥計，聽講話要拉咗閘先至同業主講租金，講得掂就可能會響五月下旬復業。
「喜萬年」所在地係熙信大廈，左丁山初出道時就跟師傅到頂樓喜萬年夜總會飲茶食飯，嗰度係老一輩賓架嘅飯堂，即使後來夜總會沒落，喜萬年仍然有一批熟客，估唔到久經風浪之餘，仍然頂唔順「沙士」。