光華文化中心主任路平接受「路訊通」訪問，係繼葉劉淑儀、周梁淑怡、范徐麗泰等香港女強人之後，第一位出現喺巴士螢幕上嘅台灣奇女子，大家可以比較吓，港台成功女性有何不同之處。
噚日路平接受訪問時同八方閒聊，話題離不開非典型肺炎，佢話SARS百年罕見，咁佢驚唔驚呢？路平不愧係才女，佢話經過呢次同港人共患難，已經認定自己下半生都係香港人，就好似張愛玲嘅名作「傾城之戀」一樣。
講到保持健康，路平話自己鍾意浮潛同行山，上個星期日佢去咗行獅子山，重話覺得隻「獅子」個鼻好挺，聽日就會去行大潭；如果係路小姐嘅「書迷」，不妨去大潭碰吓運氣搵佢攞簽名。
（圖）路平（中）帶埋自己嘅作品出席「路訊通」訪問，重講笑話香港未有書商幫佢出版，希望記者幫佢宣傳吓。
曾顯華攝
傳真︰2623-9278
電郵︰