近排同老友傾開偈，大家都話無厘頭勁升嘅股仔愈嚟愈少，最多都係炒吓工業股，如果賺十零個巴仙已經笑哈哈，似乎二三線股嘅黃金時代已經一去不返。
經紀陳就話，家陣咁嘅時勢，就算人哋有心做嘢，都已經低調好多。
好似最近成日喺電視大賣廣告嘅松日通訊（283），自從4月初搞咗一次先舊後新配股之後，股價輾轉升咗好多，只係大家唔多為意。
松日喺兩個星期前，以先舊後新方式，配售1.414億股出街，每股作價0.18元，集資約2545萬元。
當日松日股價大約係0.20元左右，但睇返噚日收市價，已經升至0.385元，幾乎升咗成倍咁滯，真係唔聲唔聲嚇人一驚，但係成交就唔算多，只係平均幾十萬元。
經紀陳又話，總之一句講晒，人哋搞私人派對，小初無謂亂參與。
慕容小初