董太日前全副武裝巡視牛頭角下邨，淪為國際笑柄，不過有前線醫護人員卻視佢為偶像，因為董太落區都着足幾層防護衣，醫護人員理應有過之而無不及。
但今次真係難為了醫管局高層，如果人人都要着「董太裝」就認真頭痛，要一下子買足咁多防護衣，畀佢哋一日換兩套都唔係易事，因為全球都缺貨，𠵱家都係買到幾多就幾多，盡量掃貨。
唔知係咪受董太啟發，《南華早報》都發起一個「護盾行動」（ProjectShield），呼籲讀者捐錢為醫護人員購買防護衣物。而《蘋果》亦發起買口罩做善事嘅運動。
醫護人員搵董太做人辦，義工卻冇眼睇。八方有位朋友早前走去做義工幫手清潔香港對抗「非典」，不過佢話香港人聞沙士色變，唔係個個學似佢有「犧牲」精神，願意走入高危地區以身試毒；董太一句「我係義工喎」之後，更令唔少人裹足，事關呢句說話好傷害義工形象，董太心直口快，不過說話講咗就收唔返，呢次都害得人多嘞！
傳真︰2623-9278
電郵︰