肺炎當道，食肆生意一落千丈，但酒店卻未見水盡鵝飛，雖然少了外地遊客光顧，但本地市民一向熱愛的自助餐，依然大有捧場客，除了是因為大酒店的衞生設施做到足外，它們亦加強了不少消毒項目，務求令所有顧客食得安心又放心。
大家不論走到酒店大堂、Lift口以至旗下各食肆門口，都會見到最當眼處多了一部全自動洗手機；佢最特別之處，係用全自動Sensor感應，一放手埋去高純度酒精就會噴到你手上作全面消毒，乾淨衞生程度，簡直可媲美醫院級！再加埋呢個名為「鮑剪揼Buffet」（$278），鮑者，鮑魚也，客人一坐低，就馬上送你一隻20至25頭原隻蠔皇燴鮑魚，淨係呢味菜就差唔多抵銷了Buffet一半價錢！
美麗華安全CheckPoint
1.員工：當值人員一定要戴口罩及手套。
2.房間：每日打掃時間，一定用清毒劑及漂白水清潔每一個角落，其中渠位更是重點地方。
3.走廊：每日都用純酒精噴灑消毒。
4.其他設備：例如健身室一類，每有客人使用過，會馬上用消毒劑清潔，泳池亦加強消毒劑量。
TheAtrium
地址：九龍尖沙嘴彌敦道118-130
電話：23155199
收費：周日至周四$278（小童及長者$158）；周五、六及公眾假期前夕 $298（小童及長者$178）。
向來深受名人歡迎的麗嘉酒店，喺呢個「戒炎」時期，附近嘅立法會議員依然係呢度嘅常客，例如田北俊；更有人話見到潘廸生扶老攜幼咁嚟食飯，由此可見呢間5星級酒店嘅乾淨衞生程度，係幾咁令人充滿信心！
講到呢度嘅搵食熱點，相信一定係酒店大堂啱啱開嘅TheCafe；餐廳走Fusion路線，日本、韓國、新加坡、印度各地名菜有齊，而且為咗令食物盡善盡美，開業前，重分別從各地嘅麗嘉酒店抽調大廚嚟教路，力求每樣食品都要有最地道色彩。
講到食品方面，據呢度嘅常客亞Dick推介，日式魚生飯勁抵食！$138就食齊新鮮鮑魚、帶子、赤貝、八爪魚、吞拿魚、鱲魚、淡水蝦、燒鰻魚等，而且份量重足二人享用，真係重平過去一般日式餐廳食！
麗嘉酒店安全CheckPoint
1.員工：全部員工，任何時刻都一定要戴口罩及手套。
2.走廊：每日定時會有專人清理。
3.其他設備：健身室器具除了每次使用後，會使用消毒劑清理外，健身室內飲品，亦全改用支裝飲品。
TheCafe
電話：22186088
地址：香港中環干諾道中3號麗嘉酒店地下
足底按摩，醫師與顧客有好一段時間的近距離接觸，本草安和堂所有員工均戴口罩；穴位按摩，身體接觸更避不了，各醫師均要求在客人面前洗手1次。其他防炎措施一樣全面，由客人乘電梯一刻起，到完成療程，接觸到每物皆會消毒1次，雖然誇張得略嫌過份，但在此時勢，誇張沒有人會說過份，誇張只會令人安心。
本草安和堂安全CheckPoint
1.員工：所有員工罩不離口。
2.洗手間：每日消毒至少10次，兼有消毒梘液供應。
店名：本草安和堂（28930199）
地址：跑馬地成和道13至19號麗成大廈1樓
收費：每小時穴位推拿$325，足底反射$197。
裝修一流的聯誼會，附設桌球部，房間夠大兼有獨立洗手間，奉行全天候消毒政策，有「毒」錯無放過，兼請你飲防炎強肺湯，還是聽董伯伯說話，少到人多的地方，約夠腳來個馬拉松式竹戰，至少玩得安心。
請教中醫的藥方推介，今個星期的強肺湯是淮山、赤小豆、藍豆、生熟薏米、木棉花、白蓮、陳皮、蜜棗煲豬踭，免費贈飲。
皇雀會安全CheckPoint
1.員工：除必戴口罩外，所有員工還硬性規定戴手套。
2.洗手間：並非所有聯誼會的雀房都有獨立洗手間，皇雀會用漂水清潔。
店名：皇雀會（27873838）
地址：旺角洗衣街74號得寶大廈3至4樓
收費：雀房小菜套餐$118起，波鐘每小時$30起。