陳錦鴻話過今年會同港台DJ女友、即係杜國威嘅姪女杜雯惠結婚，馮仁昭咁啱就收到風，話杜雯惠早兩日向港台辭職，難免令人聯想到杜雯惠係咪唔做DJ做全職主婦。
不過，馮仁昭亦都聽聞杜雯惠因為做得唔開心而劈炮，話說佢𠵱家主持港台第二台逢星期一至五晚嘅《人間定格》，但嚟緊港台有節目新編排，杜雯惠因為對新安排唔滿意，同高層鬧意見，先至把心一橫向港台辭職。
馮仁昭噚日打電話畀陳錦鴻，問佢女友杜雯惠究竟係為咗結婚？抑或做得唔開心而辭職？點知陳錦鴻即刻好驚青咁話：「我乜都唔知，佢嘅事最好都係問番佢啦！」至於佢哋幾時舉行婚禮，陳錦鴻乜都唔肯講。至於港台二台台長李再唐亦都話暫時無可奉告，睇嚟港台梗係想挽留杜雯惠啦！
關心妍噚日喺九龍灣拍攝新歌《關心……心妍》MV，呢首歌係佢特登寫嚟多謝歌迷，所以佢邀請咗一班歌迷一齊拍攝。關心妍話近日收到一位囚犯fans嘅信，對方喺監獄都有聽佢啲歌，令佢好感動，關心妍重話好想鼓勵個囚犯fans喺六月重新投入社會時，可以積極面對人生。
江欣慈（前名江希文）噚日去美孚接受Roadshow訪問。講開佢隻新碟，都可謂一波三折，原本喺今個月中推出，但因為非典型肺炎問題，搞到要押後到下個月先出。而今次阿慈拍攝唱片嘅相，有啲都幾性感。遲啲Roadshow重會播佢首新歌MV，乘客會睇到阿慈着住件bratop跳舞，好鬼性感，佢話：「呢個都算係我最sexy嘅MV。」
方力申噚日接受新城電台訪問，佢最近忙於練舞，佢話：「學跳舞就好似由零開始咁，學咗四堂都係拉筋同壓腿，雖然我游開水，但原來人年紀愈大，啲肌肉就會實晒，𠵱家我次次學完跳舞，都會手震同腰痠背痛，老師重話頭十堂都係學呢啲，唔會有真功夫教我住。」
方力申又話：「我想學翻觔斗呢類動作，如果第時拍動作片，可以大派用場，所以我好羨慕麥浚龍可以跟成家班學翻騰嘅動作。」
鄭裕玲（嘟嘟）嘅媽咪日前猝逝，嘟嘟噚日照樣喺中環開工，積極工作。問佢知唔知媽咪有乜遺願？佢話：「呢世人佢都好開心同滿足，至於陪葬品，佢做人好豁達，冇乜嘢要。而媽咪生前信天主教，但唔知有冇洗禮，應該會火葬，總之所有嘢等細佬發施號令啦！」嘟嘟話雖然近排好多唔開心嘅事，而佢就會選擇勇敢面對，佢亦希望所有香港人都係。
