自從有非典型肺炎之後，買家一聽到九龍灣淘大花園即色變，無人敢買呢個屋苑單位。事件滋擾超過一個月後，買家嘅反應三百六十度改變。一名同屋苑居民，近日以一百二十五萬元，買入S座低層單位，呎價企硬二千一百八十五元，唔係乜嘢低價成交。
蘭西細閱街道圖後，發覺S座同疫症最嚴重嘅E座，相隔幾條街，而且位處大單邊，買家係地頭蟲，果然識貨！據促成呢宗買賣嘅美聯彭文浩講，買家對淘大花園相當熟悉，所以睇樓兩日，即決定買入單位。個單位有五百七十二呎，豪華裝修，同時享有泳池景。
爆發疫症後，淘大一直沒有任何成交，到今個月中先至開齋，以九十六萬元，每方呎二千零七十八元，售出C座中層四百六十二方呎單位。買家原本居住喺觀塘，購入單位自住，兩個買家果真勇者無懼！
若果半年內減肥37磅，兼將腰圍減5吋，相信係好多人嘅夢想。中原測量行董事總經理黎堅輝（Victor），就係呢個人辦嘞。
Victor加人中記後，體重最高有一百八十磅，感到活動同思路都慢幾拍，於是毅然參加威爾斯親王醫院嘅體重控制計劃。由舊年5月起，減少應酬，按餐單進食，重有就係遵守3大戒條（戒甜品、戒消夜同戒零食），平日就跑步、打網球同做仰卧捲腹運動。半年內成功將體重減咗37磅，腰圍就由37吋半降至唔夠32吋。佢話減肥之後，工作魄力大增，新思維如泉湧喎！
上海龍頭地產代理金豐易居南下，喺香港開設嘅金豐易居‧鴻運國際，噚日開幕。城中一眾發展商售樓部頭頭都畀面出席，好似長實趙國雄、新世界何太、新地周國賢同恒基張炳強等。呢個開幕禮重有樣特別嘅，就係喺入口擺咗套紅外線測量體溫儀器，可以check吓啲嘉賓有冇事。重快過特區政府。
公司行政總裁田國強同老闆周忻，重親自示範一次畀在場人士睇㖭，以示來自上海嘅周先生一啲事都冇。田生重攞部打火機嚟試吓，儀器果然即時有反應。
田國強話，公司喺非典型肺炎肆虐期間，拍板成立同搞開幕酒會，臨尾佢就祝願，希望內地嘅SARS可以好快受到控制。出席嘅恒基張炳強就講笑話要飲沙士（汽水）喎，搞到全場哄笑。
非典型肺炎令全港市民愈嚟愈注重居住環境，愈嚟愈多人嚮往住低密度住宅，最好加埋個大花園。
華懋屯門翠景花園洋房，剩番5個貨尾，交畀中原做獨家代理，為咗配合個盤低密度設計，兼戶戶有大花園，中原準備200盆紫羅蘭，送畀今明兩日睇樓客。
紫羅蘭顏色鮮豔，而且細細盆，容易處理，就算好少接觸植物嘅城市人，都識點樣種，等啲客人過吓種花癮，順勢推銷單位，話唔定吸引到客即刻入市。
蘭西
電郵地址：
