恒指最低落到8403，收8442，低位見買意積極，尤其係個別國企，跌得急升得亦快，有啲低位回升幅度達1成。由市場氣氛睇嚟，大市短期有反彈機會，有望回升一二百點。
不妨諗吓趁低撈啲恒指Call輪，向啲交投旺而溢價唔係太離譜者埋手，對象有9723、9767、9771，全部都係8月以後至夠鐘。喺夠鐘之前，好多大藍籌如長實（001）、和黃（013）、中信泰富（267）、太A（019）等除息，會略為拖低恒指。但炒輪唔係做長線投資，喺佢哋除息前要先計數，有多少利錢到手就計數離場。
電訊股中，電盈（008）再升3格，中電信（728）上市後派首份成績表，亦升3格，聯通（762）只跌1格，中移動（941）最弱，跌夠7格，收14.85元，唔見2.3%，創99年5月以來新低。隻股票已經超賣，有機會由同類股帶番起些少，博下Call輪，趁低買9773或者9768。
死火榜上排頭位嘅係渣打Call輪9590，幾千銀貨仔成交，就由12.7仙散落6.4仙，得番1半。正股（2888）收85元，跌2元，跟倫敦嗰邊嘅價。9590下月上旬夠鐘，時日無多，行使價90元，正股𠵱家造價仍低5元，隻輪冇得剩嘅機會大過有得剩。
章盛