周杰倫俾台灣傳媒話佢恃住自己係天王就扮大牌。話說噚日周杰倫喺台灣錄影中視嘅《周日八點檔》節目，記者去到現場，製作單位話周杰倫感冒出唔到聲，所以唔做訪問，而周杰倫一見有記者，就即刻衝過去錄影廠，其間重撞跌攝影機腳架，之後周杰倫匿埋喺布景板後面唔出嚟，記者就向主持人吳宗憲反映，周杰倫先至肯出嚟做訪問。
周杰倫做訪問嗰陣，記者發現佢其實一啲病都冇，佢重喺現場節目入面大耍雙截棍，而電視台又派出主持人NoNo扮「肥版蔡依林」，同周杰倫玩番餐。
之後記者問唱片公司，唱片公司亦話周杰倫冇病，只係天氣熱，個鼻有啲唔舒服。不過，唱片公司話其實事前有同製作單位講話周杰倫唔想做訪問，但電視台就一早發咗通告畀記者嚟採訪。
而有傳話周杰倫、徐若瑄同吳建豪呢三個緋聞情人之前喺東京碰過面，周杰倫噚日就否認呢件事，重話亂寫新聞嘅媒體唔配做記者。至於好多人炮轟嘅台灣金曲獎，周杰倫共有五個入圍項目，佢話陶喆只得一項入圍，自己都替佢唔值，但係金曲獎嘅評審係咪唔公平，自己就唔方便講啲乜喎。
陳豪同向海嵐噚日喺清水灣電視城拍《鳳舞香羅》，本來陳豪係做一個拉車佬，點知佢好唔稱職，搞到坐車嘅向海嵐腳震震兼呱呱叫。而佢又同向海嵐講起政府開倉問題，陳豪話：「其實都冇用，不過好過冇啦！但係我最想就係減首次汽車登記稅，因為我想買多部車畀我爹哋、媽咪，𠵱家屋企得一部車唔夠用，減稅嘅話我可以買多部。」
安雅前日接受台灣東森台《開運鑑定圖》嘅訪問，大談佢喺年頭車禍後破相事件，佢話喺車禍後第一時間入院縫咗四十二針，而縫合咗嘅傷口就連疤痕都幾乎睇唔到。安雅原本以為已經好番晒，但係喺兩星期前，佢發現舊傷口裏面有殘存嘅玻璃碎片，於是日前又要再次開刀，重要縫多五針，真係唔話佢運滯都唔得！
黎姿噚日返將軍澳廣播城試造型，佢話：「今次拍《鳳舞香羅》有好多靚靚造型，又要唱同跳，重要着好多性感舞衣，好似低V、露臍、魚網絲襪，好似阿姐唱《熱咖啡》嗰啲衫咁，所以呢排我要keep住自己個身形，啲衫有少少多餘脂肪都會着得唔好睇，其實拍呢個劇都幾辛苦，但係要靚就冇計啦！」
張國榮去世之後，佢嘅至愛唐鶴德（唐唐）足不出戶，實在令人擔心，早前有報道話張國榮同唐唐喺加多利山嘅住所，曾經遭人惡意整爛門口嘅圍欄，噚日就有工人晨咁早喺住所門外嘅圍欄上面，加咗好多鐵絲網，以防萬一。
