昨日又有一隻股仔被斬倉，盈信控股（015）有炒家補唔到孖展，搞到股價急跌，好彩成交唔算太多，如果成交大嘅話，情況可能好大鑊，因為分分鐘係大炒家出事。
盈信噚日最低見過0.185元，收0.244元，跌幅59.3%，成交金額336.9萬元。
經紀陳話，盈信近幾個月股價雖然唔係特別升得勁，但就日日好大成交，好大機會係出面炒家按咗倉，日日喺度拋波仔所致。
盈信股價自從升上0.70元高位以後，一來冇乜大動作，亦冇特別利好消息支持股價，加上𠵱家市況咁差，炒家又點會散到貨，日日咁樣拋來拋去，真係好快就乾塘，果然有人終於頂唔住，找唔到孖展數被斬倉，導致昨日股價急跌。
經紀陳重話，今次盈信事件，有多少似上次香港葯業（182），但後者能夠在短期之內，由最低位0.122元，成功抽回0.36元水平，主要有大陸水相助，至於盈信有冇咁好彩就好難講。
慕容小初