中原網上地圖瀏覽人次已經超過九千萬，離一億不遠。中原仍不斷豐富內容，好似最近SARS肆虐，就即刻加入一欄「證實有非典型肺炎大廈名單」，等買家可以喺買樓前睇睇先至做決定。
另外，聽中原執行董事張奕威講，呢個網上地圖重會有好多嘢加，早排佢秘密練兵，同統計處合作，將全港樓盤全新分類，如將上環唐樓歸為一組，咁就可以睇到呢組樓嘅單位數目、居住人數，甚至家庭收入，單位係咪供緊，同重有幾耐至供完等一大堆資料。
張奕威透露，呢個分類工作已經完成，𠵱家正同政府傾緊，假如在中原地圖免費公開任人睇，要畀番幾多錢政府至合理，若太貴就拉倒算嘞。不過，張奕威話若果傾唔掂數，仍會將分類加入，但提供嘅資訊自然少啲啦。
住宅樓價近年愈跌愈殘，屯門麗寶大廈啱啱有單成交，呎價低見781蚊，同深圳樓價冇乜分別。
中原地產屯門分區經理周彩霞話，個單位係高層D室，面積333呎，成交價二十六萬，比上個月同類單位造價低近兩成，而且重係該廈嘅新低價㖭。
該廈單位市值月租二千七蚊，𠵱家買家用七成樓按，以十年還款期同兩厘半息率計算，月供都係千七蚊，唔怪得呢個區內客會轉租為買啦！
由於上海國際車展盛傳有人領咗「沙士」，上海政府前日即刻喝停車展之外，重發出一道「勸戒式」政令，規限所有大型活動，其中「五‧一」春季房產展就咁被打沉，累到原本有份參與宣傳展銷嘅長實畢架山一號「出師未捷」，泡湯了。至於上海中房置業原已安排香港記者去上海，諗住星期六向港滬傳媒推介豪宅漓江山水花園，亦要臨時取消。
另一邊廂，嚟香港大展拳腳嘅上海最大地產代理金豐易居，卻未因香港「沙士」勁而窒步，以金豐易居‧鴻運國際為名，如期今日搞大型開業酒會。為隆重其事同打好關係，聽講重請咗全港大發展商售樓部嘅阿頭嚟互勉一番，好似長實趙國雄、新地周國賢及雷霆、恒隆黃為山、新世界何太同恒基張炳強等，重請埋中原施永青同美聯黃建業。
疫症肆虐教訓下，呢排香港人都標榜「健康第一」。美聯重睇樓戴口罩都覺得未夠，禮拜六、日更推出「健康生活之泉」大行動，凡到東涌海堤灣畔睇樓嘅準買家，獲贈生果一個，符合保健的原則，發展商新世界就送健康禮包。講開送禮，美聯昨日於翰林苑，向記者同發展商長實大派白水晶，話可以消除負能量，有助健康及運程，連送禮都同健康有關。
另外，美聯昨日重有喜事宣布，剛奪得馬鞍山嘉華星濤灣全年銷售大獎，高級區域經理歐子軒話（圖二後左五），物業至今已售出450伙，美記市場佔有率六成，所以日前無懼非典型肺炎，點都搞番場慶功宴。
𠵱家市場上最積極搵樓嘅，相信只得番政府置貸客，皆因佢哋獲批貸款後，四個月內就要買樓。利嘉閣中央事務部高級經理何明高話，最近搞咗個「置業貸款計劃」專題講座，重請嚟律師同按揭代理公司代表講解，等員工可以更了解置貸客嘅特性、購買力同供款力等。
截至今年3月底，房署接獲3816份貸款申請，當中1270份批咗原則上批准書。另處理中嘅申請有2546份，同埋重有6000個申請名額。
蘭西
電郵地址：