放假期間，收到「垃圾傳真」，不知凡幾，當然係一丟了之。星期一收到一間殺菌消毒公司嘅直銷傳真，密麻麻一張A4紙，寫到滿晒，宣傳一番，但成封直銷信第一句就寫錯名稱：「TherecentoutbreakofSuddenAcuteRespiratorySyndrome(SARS)...」大佬，SARS已成為專門名詞，《金融時報》索性寫成Sars，呢間公司居然將第一個字Severe改為Sudden，有冇搞錯呀？花咁大心機寫成張紙英文，第一句就唔掂，嘥心機咯。左丁山並唔係專門挑剔小眉小眼之事，而係覺得香港人辦事越嚟越不夠認真，寫直銷信目的為乜？為求訂單啫，一定要簡單明快吸引對方注意，但第一句就寫錯，客人點會睇落去？
上述公司，不見經傳，簽名老闆係日本人，算數啦。復活節去馬會會所食飯，望吓報告板，見到一份馬會四月一日開始嘅新會員泊車安排通告，第一句就係Witheffectivefrom...」咦，左丁山中三讀英文文法（𠵱家冇得讀），老師鬧左丁山幾十次（左丁山考試得六十分，僅僅及格），就係要寫Witheffectfrom25April...或者係effective25April，點解𠵱家會變成Witheffectivefrom？又見過幾間大公司通告寫成effectivefrom25April...究竟係左丁山唔識英文，還是自己追唔上時代，唔識新派文法？請古德明老師或者PerryLam指教吓！正是做到老學到老，自己唔識就要問，唔使怕醜嘅。