美股杜指在3頂阻力8520徘徊，不過平頂三角形走勢近尾聲，升軌上移至8300水平，最遲下周初應有突破，綜合其他技術指標，杜指向上突破機會稍大，先試8800阻力。
趙飛雲前日見港府推出118億元救市措施，覺得冇乜料到兼會加大財赤，所以繼續持有恒指Put輪，昨日惠譽即刻調低香港評級展望，反映同樣憂慮。其實目前香港最大問題係肺炎擴散，應將金錢及資源集中先解決呢個問題，例如醫護人員不斷中招，政府應加強防護裝備，降低感染機會，須知美軍打伊拉克傷亡人數低，都係因為保護裝備好。
至於其他利用金錢有助控制肺炎擴散的措施，趙飛雲唔係專家亦可寫幾十頁紙。有錢唔識用或用不得其法，其實係港府最大問題之一。
港股噚日低見8403，為98年10月以來新低，恒指收8442，跌77點。恒指已跌穿三角形升軌8480，短期將進一步下試平行下降通道底約8280水平，跌近8300，恒指Put輪9775可先食胡，因恒指短線非常超賣，隨時會有反彈。
前日提過嘅海域（1220），噚日大跌7.6%，收1.22元，正好提供低吸機會，趙飛雲排隊在1.22元先買5萬股。海域除咗基本因素不俗，息率吸引外，技術上在1.20元亦有頗大支持，暫以1.16元止蝕。
趙飛雲