喺季後賽首戰大發神威嘅麥基迪同艾華遜，噚日命運迥異，麥基迪喺作客活塞第二場波又攻入佢季後賽新高四十六分，但喺魔術最後都慘敗收場，因為除咗佢之外冇個掂，唔輸就有鬼啦！相反艾華遜雖然噚日對黃蜂時只攞咗二十九分，但係其他球員打番出水準，最後都可以冧莊；證明喺季後賽單天保至尊嘅球隊，好難有發圍機會。
其實活塞𠵱家對付魔術嘅戰術，就係八十年代嘅「壞孩子」活塞用嚟對公牛嘅招數。當年活塞明知守唔住佐敦，所以索性畀佢狂入分，集中全力盯死其他嘅公牛球員；呢招果然有效，波神雖然幾乎場場攞成四十幾分，但係連續三年都喺季後賽俾活塞踢出局。麥基迪嘅情況就好似當年嘅佐敦咁，所以話魔術想喺季後賽晉級，其他主將就要爭氣啲喇。
非典型肺炎肆虐多倫多，公鹿最後一場嘅常規賽就係作客多倫多速龍，搞到本身係公鹿擁躉嘅美國衞生部部長湯普森，專登打電話畀公鹿教練卡爾，提醒佢要留意球員啲健康情況。我求大俠當然唔想有任何NBA球員「中招」，萬一「沙士」入侵NBA嘅話，季後賽肯定腰斬，到時最大損失嘅就喺廣大嘅球迷。
非典型肺炎肆虐，中國國內體育活動面臨全面停頓，雖然男子足球隊仍然進行集訓，但係教練阿里漢老友就爆響口，話佢計劃暫時離開中國避炎免中招，留待下月尾東亞盃前先至返嚟帶隊過日本。如果甲A聯賽最終延期，東亞盃又如期舉行，不如提早拉隊去日本備戰好過。
前晚恩沙基響補時一個挑射，令AC米蘭起死回生。最後掂波嘅係湯馬臣，官方資料顯示入球歸佢所有。不過恩沙基「入波」後闊佬懶理，即刻衝出場邊慶祝，班隊友亦撲埋佢度，反而湯馬臣就被冷落，賽後重俾意國傳媒寸佢多腳貪功㖭。咁無癮，真係唔入好過入囉。
印象中，今屆歐冠盃八強賽係近年最好睇嘅，四場波入十八球，淨係睇入波都飽。當中最正梗係曼聯對皇馬，絕無冷場，唔怪得有通訊社形容睇呢場波好似返到進攻足球大行其道嘅五、六十年代。不過去到四強各隊一定踢得謹慎，加埋有三隊戰略性強嘅意大利隊，入波肯定會少啲。
球員受球迷歡迎本來係好，但係米杜士堡助教夏利遜就擔心啱啱先傷愈復出嘅祖連奴，成日幫啲球迷簽名同影相會太操勞，所以想佢少啲咁做。米杜士堡𠵱家冇受降班威脅，又打唔到上前列位置，祖連奴幫球會喺季尾同球迷打好啲關係，有乜唔好呀？