日本樂壇最近爆出一位超新星女歌手MINMI，來自大阪嘅佢俾傳媒大讚有創作才華，玩盡R&B、HipHop同Reggae幾種不同音樂風格，聽講有日本報章話美國嗰邊嘅唱片監製，都相當欣賞MINMI，反而對秋天進軍美國嘅宇多田光不聞不問，搞到光妹十分冇面！
大阪出生嘅MINMI因為膚色比較黑，經常被誤會有黑人血統，又俾人同Misia相提並論，其實MINMI都幾把炮，上年八月推出嘅處女細碟《ThePerfectVision》已經大賣五十萬張，佢喺牙買加、東京同大阪三地錄音嘅首張大碟《Miracle》，日本推出一個月反應理想，喺Oricon榜節節上升，今個禮拜重反彈登上亞軍。
呢排東京好多唱片舖都狂谷MINMI嘅新碟，我羅拉睇過佢幾首歌嘅MV，佢真係唔只有歌藝，跳舞同扮嘢都一樣掂，一時對住鏡頭騷胸，一時又扮吸血鬼，轉頭又喺雪景下化身高貴嘅歌姬唱歌，形象可謂十分多變。