港府118億元救市措施推出後，市民及小型企業仍對港府諸多不滿，完全在阿虎預期之內。
港府今次不但無法挽回民望，措施又對振興經濟毫無用處，更會搞到財赤擴大，降低財政儲備，不如唔做好過做。阿董政府繼續其敗家作風，難怪惠譽調降香港評級展望，亦難怪聯滙成日俾炒家虎視眈眈，美電1年期溢價噚日再被扯高至逾300點子，港股則跌77點，收報8442，成交86.23億元。
4度減航班嘅國泰（293）宣布要檢討派息，嚇怕投資者，股價跌4%，收報8.50元。本來就快到手嘅每股0.56元末期息，可能冇咗或者大幅減少，國泰自然提早「除息」。
呢1年投資股票嘅主題曲係派高息，相信冇人諗到一場「春瘟」，會令到呢支主題曲唔能夠再唱落去，就算其他已宣布派高息嘅公司，無意效法國泰檢討派息，相信日後都幾難再維持派高息政策，大家可能要為今年股市另覓投資主題。
聯想（992）近日遭基金拋售，噚日一度跌破2元關口，低見1.99元，收2.10，跌6.7%。黑客話，近期SARS為患，中資股慘遭拋售，可能會拖累聯想電腦銷售表現。另外又有消息話聯想可能有較大撇帳，不過唔知真定假。近期資金走咗去美國炒科技股，遲啲SARS冇咁惡，資金可能會回流香港炒番中資科技股，所以不妨趁低吸納。
近期股價不斷下跌嘅日東科技（365），噚日終於出現斬倉，股價午後急瀉，收報0.12元，跌38%，成交增至106萬元。ｉ師傅話，此股下午「棚架」消失得無影無蹤，股價直插至0.10元才有承接。
阿虎