張國榮過咗身都成二十幾日，但佢嘅至愛唐鶴德（唐唐）依然好神傷，張國榮出殯後，唐唐都冇出過家門，只係一個人留喺屋企懷念張國榮，啲朋友擔心佢有事，曾經勸過佢搬屋，又想陪佢出埠散心，但唐唐都冇興趣。張國榮家姐張綠萍見唐唐連出街飲茶食飯都唔肯去，喺屋企又茶飯不思，成個人都落晒形，所以張大姐就成日上加多利山陪佢。
而好多歌迷都好關心張國榮啲骨灰會安放喺邊度，想去拜吓偶像，但聽講張家好尊重唐唐嘅意願，所以呢件事就由唐唐決定，但唐唐𠵱家心情重未平復，連屋企門都唔出，啲骨灰到𠵱家重未領番，所以暫時張國榮啲骨灰重未有安身之所。
Fans想拜張國榮嘅話，可能要再等多一陣，希望唐唐可以快啲重新振作起嚟，而噚日就有個婆婆到張國榮故居外，擺低鮮花、靈堂相同佛經，婆婆重傷心到喊起上嚟。
黎姿噚日同向海嵐喺清水灣拍攝新劇《鳳舞香羅》，提起非典型肺炎，佢話已經好耐冇見過佢細佬，因為佢細佬喺新界區某公立醫院做醫生，為免將病菌帶返屋企，所以一直住喺宿舍，𠵱家只好用電話聯絡。而向海嵐對接替郭羨妮演出《鳳舞香羅》，有報道話因為馬浚偉同郭羨妮不和，所以走去無綫高層曾勵珍度篤郭羨妮背脊，向海嵐話：「我寧願要健康形象都唔做是非精。」
蘇慧倫同內地創作團體「羽泉」合唱新作《還剩下甚麼》，原來「羽泉」喺內地好犀利，佢哋嘅成名作《最美》紅遍內地，三張專輯總共賣咗三百五十萬張，蘇慧倫噚日接受台灣記者訪問時就話久聞對方嘅大名，佢話：「之前經常去內地，拍戲現場總有人在哼羽泉的歌，連我都下意識地唱。」
陳豪噚日喺電視城拍攝無綫新劇《鳳舞香羅》，佢知道特首退稅都唔係好興奮，問佢退稅所得嘅錢會點用？佢就話𠵱家經濟咁差，有錢都唔會亂使，會儲起啲錢，以備不時之需，最估唔到讀番書嘅陳豪都識話：「大家遲早都會守得雲開見月明嘅！」
男子組合Boy'Z第二首主打歌《跟蹤你》日前拍攝MV，今次Kenny同Steven有幸同只得十四歲半嘅靚女、英皇新人Isabella合作，Steven喺MV中為咗令對方注意，幾乎走到氣咳，相反Kenny只係需要含情脈脈望住Isabella。拍攝完後，Steven同Kenny都異口同聲話：「Isabella只得十四歲，我哋唔會對佢有任何幻想。」
特區政府噚日宣布一連串救市計劃，其中有一項係向中小企業貸款，章小蕙噚日喺佢間中環時裝店接受訪問，佢話：「係有貸款就好啦，我第一個去排隊。政府咁做總算係沙漠中嘅一滴甘露，希望唔係海市蜃樓。」佢話因為非典型肺炎，時裝店生意額暴跌，佢話：「差唔多蝕咗三百萬。」
另外，章小蕙同前夫鍾鎮濤都決定送對仔女去台灣嘅美國學校讀書，佢話：「我約咗佢同范姜小姐一齊傾呢件事。」
